Քառասնից Մանկանց վանքը XIII դարի հայկական վանքային համալիր է: Գտնվում է Լոռու մարզի Դսեղ գյուղի հյուսիս-արևմտյան մասում` Դեբետի կիրճի աջակողմյան զառիթափ լանջի «Տախտեր» կոչվող վայրում:

Վանքը հիմնականում ավերվել է բնական աղետների և ժամանակի ազդեցության հետևանքով։ Չնայած կիսավեր վիճակին՝ այստեղ դեռ պահպանվել են միջնադարյան ճարտարապետական տարրեր, վիմագրություններ և խաչքարեր։ Համալիր կարելի է հասնել Դսեղից կամ Ձորագետի կողմից՝ հետիոտնային արահետներով։

 

Անվան պատմությունը

Վանքի անվանումը կապված է Քառասուն Սուրբ նահատակների հիշատակի հետ։ Ըստ քրիստոնեական ավանդության՝ 4-րդ դարի սկզբին Սեբաստիա քաղաքում ծառայող քառասուն քրիստոնյա զինվորներ, հավատարիմ մնալով իրենց հավատքին, ենթարկվել են հալածանքների և նահատակվել հռոմեական իշխանությունների հրամանով։ Նրանց հիշատակը հետագայում հավերժացվել է տարբեր սրբավայրերում։